ᠪᠠᠷᠢᠶᠠ ᠬᠢᠬᠦ ᠭᠡᠳᠡᠭ ᠪᠣᠯ ᠤᠷᠭᠤᠮᠠᠯ ᠤᠨ ᠬᠠᠯᠢᠰᠤ ᠪᠤᠶᠤ ᠠᠮᠢᠲᠠᠨ ᠤ ᠪᠠᠭᠠᠰᠤ᠂ ᠴᠢᠯᠠᠭᠤ ᠶᠢᠨ ᠵᠦᠢᠯ᠂ ᠬᠦᠵᠢ ᠵᠡᠷᠭᠡ ᠶᠢ ᠦᠢᠯᠡᠳᠴᠤ᠂ ᠡᠮ ᠲᠠᠢ | ᠬᠤᠯᠢᠵᠤ ᠬᠠᠯᠠᠭᠤᠨ ᠵᠢᠩ ᠲᠠᠯᠪᠢᠬᠤ ᠵᠠᠰᠠᠯᠭᠠ ᠶᠢ ᠵᠢᠭᠠᠵᠤ ᠪᠤᠢ᠃ | ᠮᠤᠩᠭᠤᠯ ᠡᠮᠨᠡᠯᠭᠡ ᠶᠢᠨ ᠪᠠᠷᠢᠶᠠ ᠶᠢᠨ ᠵᠠᠰᠠᠯᠭᠠ ᠳᠤ ᠴᠠᠭᠠᠨ ᠪᠠᠷᠢᠶᠠ᠂ ᠪᠤᠷᠤ ᠪᠠᠷᠢᠶᠠ ᠪᠤᠢ᠃ ᠴᠠᠭᠠᠨ ᠪᠠᠷᠢᠶᠠ ᠨᠢ ᠪᠤᠭᠤᠲᠠᠢ ᠶᠢᠨ ᠬᠠᠯᠢᠰᠤ᠂ ᠲᠡᠮᠡᠭᠡᠨ | ᠬᠢᠷᠭᠤᠤᠯ ᠤᠨ ᠦᠨᠡᠰᠦ᠂ ᠴᠢᠯᠠᠭᠤᠨ ᠨᠡᠬᠦᠷᠡᠰᠦ᠂ ᠬᠦᠵᠢ ᠲᠡᠷᠢᠬᠦᠳᠡᠨ ᠢ ᠡᠮ ᠲᠠᠢ ᠵᠤᠬᠢᠴᠠᠭᠤᠯᠤᠨ ᠨᠠᠶᠢᠷᠠᠭᠤᠯᠵᠤ ᠲᠤᠭᠤᠭᠠᠨ ᠳᠤ ᠬᠢᠵᠤ ᠰᠠᠶᠢᠳᠤᠷ ᠬᠠᠯᠠᠭᠠᠭᠠᠳ᠂ | ᠪᠦᠰ ᠤᠭᠤᠲᠠᠨ ᠳᠤ ᠰᠠᠪᠠᠯᠠᠵᠤ᠂ ᠬᠠᠯᠠᠭᠤᠨ ᠢᠶᠠᠷ ᠨᠢ ᠡᠪᠡᠳᠴᠢᠲᠡᠨ ᠤ ᠡᠪᠡᠳᠴᠤ ᠪᠠᠶᠢᠭᠠ ᠭᠠᠵᠠᠷ ᠲᠤ ᠨᠢ ᠲᠠᠯᠪᠢᠬᠤ ᠪᠤᠶᠤ ᠲᠡᠭᠡᠷᠡ ᠨᠢ ᠰᠠᠭᠤᠯᠭᠠᠵᠤ | ᠲᠤᠭᠲᠠᠭᠰᠠᠨ ᠴᠠᠭ ᠬᠦᠷᠲᠡᠯᠡ ᠵᠠᠰᠠᠳᠠᠭ᠂ ᠡᠨᠡᠬᠦ ᠵᠠᠰᠠᠯᠭᠠ ᠶᠢᠨ ᠲᠠᠭᠠᠤ ᠬᠤᠷᠢᠨ ᠨᠢᠭᠡᠨ ᠡᠳᠦᠷ ᠤᠨ ᠵᠠᠰᠠᠯ ᠤᠨ ᠡᠮ ᠤᠤᠭᠤᠯᠭᠠᠵᠤ ᠵᠠᠰᠠᠬᠤ ᠶᠢ ᠬᠡᠯᠡᠨᠡ᠃ | ᠪᠤᠷᠤ ᠪᠠᠷᠢᠶᠠ ᠭᠡᠳᠡᠭ ᠪᠣᠯ ᠡᠪᠡᠳᠴᠢᠲᠡᠨ ᠢ ᠮᠠᠯ ᠤᠨ ᠬᠠᠯᠠᠭᠤᠨ ᠰᠠᠪᠡᠰᠦᠨ ᠲᠡᠭᠡᠷᠡ ᠰᠠᠭᠤᠯᠭᠠᠵᠤ ᠵᠠᠰᠠᠬᠤ ᠶᠢ ᠬᠡᠯᠡᠵᠤ ᠪᠤᠢ᠃ ᠮᠠᠯ ᠢ ᠠᠯᠠᠮᠠᠭᠴᠠ ᠲᠠᠷᠤᠢ | ᠬᠦᠵᠡᠭᠡ ᠶᠢ ᠨᠢ ᠰᠡᠪᠡᠰᠦ ᠲᠠᠢ ᠨᠢ ᠭᠠᠷᠭᠠᠵᠤ ᠠᠪᠤᠭᠠᠳ ᠲᠤᠳᠤᠷᠠ ᠨᠢ ᠡᠮ ᠤᠨ ᠵᠦᠢᠯ ᠢ ᠵᠤᠬᠢᠴᠠᠭᠤᠯᠤᠨ ᠬᠢᠵᠤ ᠬᠤᠯᠢᠭᠠᠳ ᠲᠡᠭᠡᠷᠡ ᠨᠢ ᠡᠪᠡᠳᠴᠢᠲᠡᠨ ᠢ | ᠵᠠᠶᠢᠳᠠᠯᠠᠭᠤᠯᠤᠨ ᠰᠠᠭᠤᠯᠭᠠᠵᠤ ᠰᠡᠪᠡᠰᠦᠨ ᠤ ᠬᠠᠯᠠᠭᠤᠨ ᠢᠶᠠᠷ ᠡᠪᠡᠳᠴᠢᠨ ᠵᠠᠰᠠᠬᠤ ᠶᠢ ᠵᠢᠭᠠᠵᠤ ᠪᠤᠢ᠃ ᠡᠬᠦᠨ ᠢ ᠮᠤᠩᠭᠤᠯ ᠡᠮᠨᠡᠯᠭᠡ ᠳᠤ ᠬᠦᠬᠦᠬᠦᠯᠭᠡ ᠶᠢᠨ ᠵᠠᠰᠠᠯᠭᠠ | ᠭᠡᠳᠡᠭ᠃ ᠡᠪᠡᠳᠴᠢᠲᠡᠨ ᠢ ᠡᠨᠡ ᠮᠡᠳᠦ ᠰᠡᠪᠡᠰᠦᠨ ᠳᠤ ᠰᠠᠭᠤᠯᠭᠠᠵᠤ ᠵᠠᠰᠠᠬᠤ ᠶᠢᠨ ᠬᠠᠮᠳᠤ ᠮᠥᠨ ᠴᠦ ᠬᠤᠷᠢᠨ ᠨᠢᠭᠡᠨ ᠡᠳᠦᠷ ᠤᠨ ᠵᠠᠰᠠᠯ ᠤᠨ ᠡᠮ ᠤᠤᠭᠤᠬᠤ ᠪᠠ | ᠴᠡᠭᠡᠷ ᠬᠢᠬᠦ ᠶᠤᠰᠤᠲᠠᠢ ᠪᠠᠶᠢᠳᠠᠭ᠃ | ᠡᠮᠡᠭᠳᠠᠶᠢᠴᠤᠳ ᠤᠨ ᠡᠩ ᠤᠨ ᠦᠶᠡ ᠶᠢᠨ ᠡᠷᠡᠬᠦᠯ ᠬᠠᠮᠠᠭᠠᠯᠠᠯ ᠮᠠᠭᠤ᠂ ᠲᠤᠳᠤᠷᠠ ᠦᠮᠦᠳᠤ ᠴᠡᠪᠡᠷ ᠪᠤᠰᠤ᠂ ᠬᠤᠷᠢᠴᠠᠯ ᠬᠡᠳᠦᠷᠡᠭᠰᠡᠨ᠂ ᠰᠠᠷᠠ ᠳᠤ ᠰᠠᠭᠤᠵᠤ | ᠴᠡᠭᠡᠷ ᠠᠯᠳᠠᠭᠰᠠᠨ᠂ ᠬᠦᠨᠳᠦ ᠭᠦᠴᠢᠷ ᠠᠵᠢᠯ ᠲᠤᠬᠢᠶᠠᠯᠳᠤᠭᠰᠠᠨ᠂ ᠲᠠᠭᠠᠷᠠᠵᠤ ᠬᠦᠷᠦᠭᠰᠡᠨ ᠠᠴᠠ ᠵᠢᠩ ᠴᠢᠬᠢᠭ ᠲᠤ ᠠᠪᠲᠠᠭᠳᠠᠭᠰᠠᠨ ᠵᠡᠷᠭᠡ ᠰᠢᠯᠲᠠᠭᠠᠨ ᠠᠴᠠ | ᠪᠤᠯᠵᠤ ᠦᠨᠳᠡᠭᠡᠪᠴᠢ ᠶᠢᠨ ᠲᠤᠳᠤᠭᠠᠳᠤ ᠨᠦᠬᠦᠴᠡᠯ ᠲᠠᠢ ᠬᠢᠮᠤᠷᠠᠭᠰᠠᠨ ᠢᠶᠠᠷ ᠰᠠᠷᠠ ᠶᠢᠨ ᠭᠬᠢᠷ ᠲᠡᠭᠰᠢ ᠪᠤᠰᠤ᠂ ᠤᠯᠠᠭᠠᠨ ᠴᠠᠭᠠᠨ ᠢᠶᠠᠷ ᠪᠠᠭᠤᠯᠭᠠᠵᠤ ᠢᠳᠡᠭᠡ ᠨᠦᠵᠢ | ᠭᠠᠷᠬᠤ ᠪᠤᠶᠤ ᠦᠮᠡᠭᠡᠢ ᠦᠨᠦᠷ ᠲᠠᠢ ᠰᠢᠷᠠ ᠦᠩᠭᠡ ᠲᠠᠢ ᠪᠤᠯᠵᠤ ᠴᠠᠭ ᠪᠤᠰᠤ ᠪᠠᠷ ᠴᠤᠪᠤᠷᠠᠬᠤ᠂ ᠤᠭᠤᠴᠠ ᠨᠢᠷᠤᠭᠤ ᠪᠠᠷ ᠡᠪᠡᠳᠬᠦ ᠬᠦᠰᠢᠬᠦ᠂ ᠬᠤᠶᠠᠷ ᠴᠠᠪᠢ ᠶᠢᠨ | ᠬᠤᠩᠬᠤᠷ ᠢᠶᠠᠷ ᠲᠠᠲᠠᠯᠳᠤᠬᠤ᠂ ᠲᠠᠰᠢᠶᠠ ᠪᠠᠷ ᠴᠢᠷᠦᠭᠳᠡᠬᠦ ᠴᠢᠨᠦᠷᠡᠬᠦ᠂ ᠬᠤᠶᠠᠷ ᠭᠤᠶᠠ ᠶᠢᠨ ᠲᠤᠳᠤᠷᠠ ᠪᠤᠯᠴᠢᠩ ᠲᠠᠲᠠᠯᠳᠤᠬᠤ᠂ ᠲᠠᠮᠢᠷ ᠲᠡᠩᠭᠡᠬᠡ ᠰᠤᠯᠠᠷᠠᠬᠤ ᠵᠡᠷᠭᠡ | ᠢᠯᠡᠷᠡᠯ ᠲᠠᠢ ᠡᠪᠡᠳᠴᠢᠲᠡᠨ ᠳᠤ ᠲᠤᠬᠢᠷᠠᠨᠠ᠃ | ᠪᠤᠷᠤ ᠪᠠᠷᠢᠶᠠ ᠶᠢᠨ ᠵᠠᠰᠠᠯᠭᠠ ᠬᠢᠬᠦ ᠳᠤ ᠪᠠᠨ ᠪᠢᠯᠢᠭ ᠤᠨ ᠤᠯᠠᠷᠢᠯ ᠤᠨ ᠬᠠᠪᠤᠷ ᠤᠨ ᠰᠡᠬᠦᠯ ᠰᠠᠷᠠ ᠪᠤᠶᠤ ᠵᠤᠨ ᠤ ᠡᠬᠢᠨ ᠰᠠᠷᠠ ᠳᠤ ᠰᠠᠶ᠋ᠢ ᠰᠢᠨᠠ | ᠨᠤᠭᠤᠭᠠᠨ ᠳᠤ ᠴᠠᠳᠴᠤ ᠪᠠᠶᠢᠬᠤ ᠡᠷᠡ ᠲᠦᠯᠦᠭᠡᠨ ᠬᠤᠨᠢ ᠶᠢ ᠨᠢᠳᠤᠯᠵᠤ ᠮᠠᠰᠢ ᠲᠦᠷᠭᠡᠨ ᠢᠶᠠᠷ ᠦᠪᠴᠢᠵᠤ ᠬᠦᠵᠡᠭᠡ ᠶᠢ ᠨᠢ ᠭᠠᠷᠭᠠᠵᠤ᠂ ᠭᠦᠵᠡᠭᠡ ᠲᠠᠢ | ᠰᠡᠪᠡᠰᠦ ᠶᠢ ᠨᠢ ᠠᠪᠴᠤ ᠤᠯᠠᠭᠠᠨ ᠬᠤᠭᠤᠯᠠᠢ ᠶᠢ ᠨᠢ ᠵᠠᠩᠭᠢᠳᠴᠤ ᠠᠮᠠᠰᠠᠷ ᠢ ᠨᠢ ᠪᠢᠳᠡᠬᠦᠯᠡᠨᠡ᠃ ᠡᠮᠴᠢ ᠡᠨᠡ ᠦᠶᠡ ᠳᠤ ᠰᠢᠮᠢᠰᠢᠨ ᠵᠢᠷᠭᠤᠭᠠ᠂ ᠤᠯᠤᠭᠠᠢ ᠶᠢᠨ | ᠭᠡᠢ ᠶᠢᠨ ᠠᠷᠪᠠᠨ ᠭᠤᠷᠪᠠ ᠶᠢ ᠨᠢᠭᠡ ᠵᠢᠩ ᠠᠷᠢᠬᠢ ᠨᠢᠭᠡ ᠵᠢᠩ ᠼᠤᠤ ᠲᠠᠢ ᠪᠤᠴᠠᠯᠭᠠᠵᠤ ᠪᠡᠯᠡᠬᠡᠨ ᠪᠤᠯᠭᠠᠭᠰᠠᠨ ᠢᠶᠠᠨ ᠬᠦᠵᠡᠭᠡ ᠶᠢᠨ ᠠᠮᠠᠰᠠᠷ ᠢᠶᠠᠷ ᠨᠢ ᠰᠠᠪᠡᠰᠦᠨ ᠳᠤ | ᠬᠤᠯᠢᠵᠤ᠂ ᠠᠮᠠᠰᠠᠷ ᠢ ᠨᠢ ᠤᠯᠤᠰᠤ ᠪᠠᠷ ᠴᠢᠩᠭᠠ ᠪᠤᠭᠤᠵᠤ ᠠᠮᠠ ᠶᠢ ᠨᠢ ᠲᠤᠷᠤᠭᠰᠢ ᠬᠠᠨᠳᠤᠭᠤᠯᠵᠤ ᠢᠰᠡᠭᠡᠢ ᠲᠡᠪᠢᠰᠭᠡᠷ ᠲᠡᠭᠡᠷᠡ ᠲᠠᠯᠪᠢᠨ ᠬᠦᠵᠡᠭᠡ ᠶᠢᠨ ᠬᠤᠶᠠᠷ | ᠮᠤᠬᠤᠷ ᠪᠤᠯᠤᠩ ᠤᠨ ᠬᠤᠭᠤᠷᠤᠨᠳᠤᠬᠢ ᠬᠤᠯᠪᠤᠭᠠᠰᠤ ᠬᠤᠵᠢᠷᠬᠠᠢ ᠶᠢ ᠨᠢ ᠬᠤᠶᠠᠷ ᠭᠠᠷ ᠢᠶᠠᠷ ᠢᠶᠠᠨ ᠬᠤᠶᠠᠷ ᠲᠡᠶᠢᠰᠢ ᠨᠢ ᠲᠤᠭᠳᠤᠷᠴᠦ ᠪᠢᠳᠡᠬᠦᠦ ᠪᠠᠷ ᠨᠢ ᠰᠠᠯᠭᠠᠭᠠᠳ | ᠡᠪᠡᠳᠴᠢᠲᠡᠨ ᠢᠶᠠᠨ ᠬᠦᠵᠡᠭᠡᠨ ᠲᠡᠭᠡᠷᠡ ᠨᠢ ᠬᠤᠶᠠᠷ ᠡᠪᠤᠳᠦᠭ ᠢ ᠨᠢ ᠨᠤᠭᠤᠯᠵᠤ ᠰᠠᠭᠤᠯᠭᠠᠭᠠᠳ ᠬᠠᠯᠠᠭᠤᠪᠳᠤᠷ ᠠᠷᠠᠰᠤ ᠶᠢ ᠨᠢ ᠱᠠᠯᠳᠠᠩ ᠪᠡᠶᠡ ᠳᠤᠨᠢ ᠨᠦᠮᠦᠷᠦᠬᠦᠯᠵᠤ | ᠂ ᠨᠢᠮᠭᠡᠨ ᠬᠦᠨᠵᠢᠯᠡ ᠪᠠᠷ ᠪᠢᠳᠡᠬᠦᠦ ᠬᠤᠴᠢᠵᠤ ᠡᠪᠡᠳᠴᠢᠲᠡᠨ ᠤ ᠭᠠᠷ ᠲᠤ ᠨᠢ ᠰᠢᠪᠦᠭᠡ ᠪᠠᠷᠢᠭᠤᠯᠤᠨ ᠰᠠᠭᠤᠯᠭᠠᠭᠠᠳ ᠬᠤᠶᠠᠷ ᠱᠠᠯᠳᠠᠩ ᠪᠦᠭᠡᠷᠡ ᠶᠢ ᠨᠢ ᠬᠤᠶᠠᠷ | ᠴᠢᠬᠢᠨ ᠳᠤ ᠨᠢ ᠨᠠᠭᠠᠵᠤ ᠲᠤᠷᠳᠤᠩ ᠢᠶᠠᠷ ᠤᠷᠢᠶᠠᠵᠤ ᠲᠤᠯᠤᠭᠠᠢ ᠲᠡᠭᠡᠷᠡ ᠨᠢ ᠲᠠᠪᠬᠤᠷ ᠬᠡᠳᠡᠰᠦ ᠶᠢ ᠨᠢ ᠡᠮᠦᠰᠦᠬᠦᠯᠵᠤ᠂ ᠪᠦᠰᠡᠨ ᠤ ᠦᠵᠦᠬᠦᠷ ᠢᠶᠠᠷ ᠠᠷᠤ | ᠲᠤᠤᠭᠤᠷ ᠨᠢ ᠤᠶᠠᠵᠤ ᠲᠤᠭᠳᠠᠭᠠᠭᠠᠳ ᠲᠡᠭᠡᠷᠡ ᠨᠢ ᠬᠦᠪᠤᠩᠲᠠᠢ ᠮᠠᠯᠠᠭᠠᠢ ᠲᠠᠷᠤᠭᠤᠯᠵᠤ ᠨᠠᠮ ᠵᠢᠮ ᠰᠠᠭᠤᠯᠭᠠᠨᠠ᠃ ᠡᠨᠡ ᠦᠶᠡ ᠳᠤ ᠬᠤᠯᠠᠭᠠᠢ ᠰᠠᠯᠬᠢ ᠠᠪᠬᠤ ᠠᠴᠠ | ᠬᠢᠴᠢᠶᠡᠵᠤ᠂ ᠡᠬᠦᠳᠡ ᠴᠤᠩᠬᠤ ᠪᠠᠨ ᠬᠠᠭᠠᠨᠠ᠃ ᠬᠠᠭᠠᠰ ᠴᠠᠭ ᠤᠨ ᠲᠠᠷᠠᠭᠠ᠂ ᠬᠦᠵᠡᠭᠡ ᠲᠠᠢ ᠰᠡᠪᠡᠰᠦ ᠨᠢ ᠰᠢᠮᠢᠰᠢᠨ ᠵᠢᠷᠭᠤᠭᠠ ᠶᠢᠨ ᠭᠠᠯ ᠬᠤᠵᠢᠷ᠂ | ᠬᠡᠰᠢᠬᠦᠨᠡ ᠶᠢᠨ ᠦᠨᠳᠦᠰᠦ᠂ ᠤᠯᠤᠭᠠᠢ ᠶᠢᠨ ᠭᠡᠢ ᠶᠢᠨ ᠠᠷᠪᠠᠨ ᠭᠤᠷᠪᠠ ᠶᠢᠨ ᠤᠯᠠᠭᠠᠨ ᠲᠠᠪᠤᠰᠤ᠂ ᠰᠸᠡᠪᠤᠷᠤ᠂ ᠪᠢᠪᠠᠯᠢᠩ᠂ ᠫᠤᠸᠠᠷᠢ᠂ ᠰᠢᠩᠽᠡ᠂ ᠰᠦᠭᠮᠡᠯ᠂ | ᠭᠠᠭᠤᠯᠠ ᠵᠡᠷᠭᠡ ᠶᠢᠨ ᠬᠠᠯᠠᠭᠤᠨ ᠡᠮ᠂ ᠬᠦᠮᠦᠨ ᠤ ᠪᠡᠶᠡ ᠶᠢᠨ ᠢᠯᠴᠢ᠂ ᠬᠤᠴᠢᠯᠭᠠ᠂ ᠴᠠᠭ ᠠᠭᠤᠷ ᠤᠨ ᠲᠤᠯᠠᠭᠠᠨ ᠢᠶᠠᠷ ᠰᠡᠪᠡᠰᠦ ᠨᠢ ᠪᠢᠳᠡᠬᠦᠦ ᠢᠰᠴᠦ ᠬᠦᠵᠡᠭᠡᠨ | ᠲᠤᠳᠤᠷᠠ ᠨᠢ ᠬᠡᠢ ᠲᠦᠬᠦᠷᠴᠤ ᠬᠦᠵᠡᠭᠡᠨ ᠤ ᠬᠤᠶᠠᠷ ᠪᠤᠯᠤᠩ ᠨᠢ ᠡᠮᠡᠭᠡᠯ ᠤᠨ ᠪᠦᠭᠦᠷᠭᠡ ᠮᠡᠳᠦ ᠲᠡᠭᠡᠭᠰᠢ ᠪᠤᠰᠴᠤ ᠢᠷᠡᠬᠦ ᠳᠤ ᠡᠪᠡᠳᠴᠢᠲᠡᠨ ᠪᠠᠷᠢᠭᠰᠠᠨ | ᠰᠢᠪᠦᠭᠡ ᠪᠠᠷ ᠢᠶᠠᠨ ᠬᠦᠵᠡᠭᠡ ᠪᠠᠨ ᠬᠠᠳᠬᠤᠵᠤ ᠬᠡᠢ ᠶᠢ ᠨᠢ ᠤᠯᠠᠨ ᠲᠠᠬᠢᠨ ᠭᠠᠷᠭᠠᠨᠠ᠃ | ᠲᠠᠷᠠᠭᠠ ᠨᠢ ᠬᠤᠨᠢᠨ ᠤ ᠭᠤᠤᠯ ᠮᠢᠬᠠ ᠶᠢ ᠨᠠᠷᠢᠨ ᠬᠡᠷᠴᠢᠵᠤ ᠪᠤᠴᠠᠯᠭᠠᠭᠠᠳ ᠲᠤᠷᠠᠭ ᠮᠢᠬᠠᠨ ᠤ ᠱᠦᠯᠦᠨ ᠳᠤ ᠰᠤᠩᠬᠢᠨᠠ ᠬᠢᠵᠤ᠂ ᠬᠠᠯᠠᠭᠤᠪᠳᠤᠷ | ᠱᠦᠯᠦ ᠪᠠᠷ ᠵᠶᠠᠨ ᠠᠭᠠᠷᠤ ᠭᠤᠴᠢᠨ ᠲᠠᠪᠤ ᠶᠢ ᠲᠠᠷᠤᠭᠤᠯᠵᠤ ᠤᠤᠭᠤᠯᠭᠠᠨᠠ᠃ ᠡᠨᠡ ᠮᠡᠳᠦ ᠪᠠᠷ ᠴᠠᠭ ᠬᠠᠭᠠᠰ ᠦᠩᠭᠡᠷᠡᠬᠦ ᠦᠶᠡ ᠳᠤ ᠬᠦᠵᠡᠭᠡᠨ ᠤ ᠬᠠᠯᠠᠭᠤᠨ | ᠢᠯᠴᠢ ᠨᠢ ᠪᠠᠭᠤᠷᠠᠬᠤ ᠳᠤ ᠡᠪᠡᠳᠴᠢᠲᠡᠨ ᠢᠶᠠᠨ ᠬᠦᠵᠡᠭᠡᠨ ᠠᠴᠠ ᠪᠠᠭᠤᠯᠭᠠᠵᠤ᠂ ᠨᠠᠭᠠᠭᠰᠠᠨ ᠪᠦᠬᠡᠷᠡ᠂ ᠲᠤᠯᠤᠭᠠᠢ ᠲᠡᠭᠡᠷᠡ ᠨᠢ ᠲᠠᠯᠪᠢᠭᠰᠠᠨ ᠲᠠᠪᠬᠤᠷ ᠬᠡᠳᠡᠰᠦ᠂ | ᠨᠦᠮᠦᠷᠦᠬᠦᠯᠦᠭᠰᠡᠨ ᠠᠷᠠᠰᠤ ᠪᠠᠨ ᠠᠪᠴᠤ᠂ ᠬᠠᠭᠤᠷᠠᠢ ᠬᠤᠪᠴᠠᠰᠤ ᠡᠮᠦᠰᠭᠡᠵᠤ᠂ ᠬᠠᠭᠤᠷᠠᠢ ᠲᠠᠪᠢᠰᠭᠡᠷ ᠲᠡᠭᠡᠷᠡ ᠦᠨᠳᠦᠷ ᠲᠡᠷᠡ ᠲᠡᠷᠡᠯᠡᠬᠦᠯᠵᠤ ᠬᠤᠴᠢᠭᠠᠳ᠂ | ᠬᠦᠯᠦᠰᠦ ᠨᠢ ᠵᠤᠭᠰᠤᠬᠤ ᠦᠶᠡ ᠳᠤ ᠰᠢᠷᠠ ᠲᠤᠰᠤ ᠲᠦᠷᠬᠢᠵᠤ ᠰᠢᠷᠠ ᠦᠰᠦᠨ ᠰᠦᠪᠡ ᠶᠢ ᠨᠢ ᠪᠦᠭᠯᠡᠨᠡ᠃ | ᠪᠤᠷᠤ ᠪᠡᠷᠢᠶᠠ ᠶᠢᠨ ᠵᠠᠰᠠᠯᠭᠠ ᠬᠢᠭᠰᠡᠳ ᠢ ᠡᠮᠴᠢᠯᠡᠬᠦ ᠳᠤ ᠪᠠᠨ ᠲᠦᠷᠦᠬᠦᠦ ᠲᠤᠯᠤᠭᠠᠨ ᠬᠤᠨᠤᠭ ᠲᠤ ᠦᠷᠯᠦᠭᠡ ᠪᠦᠷᠢ ᠦᠯᠦᠨ ᠢᠶᠠᠷ ᠽᠠᠭᠠᠷ ᠮᠠᠷ ᠲᠠᠩ ᠢ | ᠤᠰᠤᠨ ᠳᠤ ᠪᠤᠴᠠᠯᠭᠠᠵᠤ ᠬᠦᠢᠳᠡᠨ ᠪᠦᠯᠢᠶᠡᠨ ᠢᠶᠠᠷ ᠨᠢ ᠤᠤᠭᠤᠯᠭᠠᠵᠤ ᠤᠷᠤᠨ ᠢᠶᠠᠨ ᠠᠯᠳᠠᠭᠰᠠᠨ ᠮᠠᠭᠤ ᠴᠢᠰᠦ ᠲᠤᠯᠤᠭᠠᠢ ᠳᠤ ᠭᠠᠷᠴᠤ ᠨᠢᠳᠦ ᠨᠢ ᠤᠯᠠᠶᠢᠵᠤ | ᠪᠤᠶᠢᠯᠠ ᠨᠢ ᠬᠦᠭᠡᠬᠦ ᠠᠴᠠ ᠰᠡᠷᠭᠡᠶᠢᠯᠡᠬᠦ ᠬᠡᠷᠡᠭᠲᠡᠢ᠃ ᠦᠳᠡ ᠶᠢᠨ ᠡᠮᠦᠨᠡ ᠰᠢᠮᠢᠰᠢᠨ ᠵᠢᠷᠭᠤᠭᠠ ᠶᠢ ᠤᠰᠤ ᠪᠠᠷ᠂ ᠦᠳᠡ ᠶᠢᠨ ᠬᠤᠶᠢᠨᠠ ᠰᠦᠭᠮᠡᠯᠵᠢᠯᠬᠤᠷ ᠢ | ᠱᠦᠯᠦ ᠪᠠᠷ᠂ ᠦᠳᠡᠰᠢ ᠷᠠᠰᠢᠨᠠᠮᠵᠢᠯ ᠢ ᠰᠢᠷᠠ ᠠᠷᠢᠬᠢ ᠪᠠᠷ ᠲᠤᠰ ᠲᠤᠰ ᠲᠠᠷᠤᠭᠤᠯᠵᠤ ᠤᠤᠭᠤᠯᠭᠠᠨᠠ᠃ | ᠲᠤᠮᠳᠠᠳᠤ ᠲᠤᠯᠤᠭᠠᠨ ᠬᠤᠨᠤᠭ ᠪᠠ ᠰᠡᠬᠦᠯᠴᠢ ᠶᠢᠨ ᠲᠤᠯᠤᠭᠠᠨ ᠬᠤᠨᠤᠭ ᠲᠤ ᠡᠮᠴᠢᠯᠡᠭᠡ ᠳᠤ ᠡᠪᠡᠳᠴᠢᠲᠡᠨ ᠤ ᠢᠯᠡᠷᠡᠯ ᠢ ᠨᠢ ᠦᠵᠡᠨᠡ᠃ ᠪᠤᠷᠤ ᠪᠠᠷᠢᠶᠠ | ᠪᠠᠷᠢᠭᠰᠠᠨ ᠡᠪᠡᠳᠴᠢᠲᠡᠨ ᠢ ᠰᠤᠪᠢᠯᠠᠬᠤ ᠳᠤ ᠪᠠᠨ ᠪᠦᠳᠦᠨ ᠬᠤᠷᠢᠨ ᠨᠢᠭᠡᠨ ᠡᠳᠦᠷ ᠲᠤ ᠭᠤᠤᠯ ᠤᠰᠤ ᠭᠠᠳᠤᠯᠬᠤ᠂ ᠬᠦᠯᠦᠰᠦ ᠲᠡᠯᠡᠰᠬᠦ᠂ ᠲᠠᠭᠠᠷᠠᠬᠤ᠂ ᠡᠳᠦᠷ ᠶᠡᠭᠡ | ᠤᠨᠳᠠᠬᠤ᠂ ᠬᠤᠷᠢᠴᠠᠯ ᠡᠳ᠋ᠯᠡᠬᠦ᠂ ᠬᠠᠳᠠᠭᠤ ᠬᠦᠴᠦᠯᠡᠬᠦ᠂ ᠤᠰᠤ ᠲᠠᠮᠨᠠᠬᠤ᠂ ᠠᠷᠤᠭ ᠡᠬᠦᠷᠬᠦ᠂ ᠤᠨᠤᠭᠠ ᠤᠨᠤᠬᠤ᠂ ᠠᠷᠢᠬᠢ ᠤᠤᠭᠤᠬᠤ᠂ ᠨᠠᠭᠠᠳᠤᠮ ᠴᠡᠩᠭᠡᠨ ᠳᠤ | ᠤᠷᠤᠬᠤ᠂ ᠬᠡᠷᠡᠭᠦᠯ ᠴᠤᠤᠬᠢᠶᠠᠨ ᠬᠢᠬᠦ᠂ ᠠᠭᠤᠷ ᠤᠮᠤᠭ ᠭᠠᠷᠭᠠᠬᠤ ᠶᠢ ᠴᠡᠭᠡᠷᠯᠡᠵᠤ᠂ ᠪᠡᠶᠡ ᠰᠡᠳᠬᠢᠴᠡ ᠶᠢᠨ ᠲᠠᠯᠠ ᠪᠠᠷ ᠠᠮᠤᠷ ᠮᠡᠨᠳᠤ ᠪᠠᠶᠢᠯᠭᠠᠬᠤ ᠬᠡᠷᠡᠭᠲᠡᠢ᠃ | ᠴᠠᠭᠠᠨ ᠪᠠᠷᠢᠶᠠ ᠭᠡᠳᠡᠭ ᠨᠢ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠨᠡᠷᠡ ᠲᠤᠮᠢᠶᠠ ᠪᠠᠷ ᠪᠣᠯ ᠹᠢᠽᠢᠺ ᠤᠨ ᠵᠠᠰᠠᠯ ᠢ ᠭᠡᠯᠡᠨᠡ᠃ ᠲᠡᠷᠡ ᠨᠢ ᠮᠤᠷᠢ᠂ ᠮᠤᠲ᠋ᠤᠷ᠂ ᠮᠠᠰᠢᠨ ᠲᠡᠷᠭᠡ | ᠂ ᠬᠠᠳᠠ ᠡᠷᠬᠢ ᠠᠴᠠ ᠤᠨᠠᠵᠤ ᠤᠶᠢᠴᠢᠭᠠᠳ ᠵᠢᠷᠦᠭᠡ᠂ ᠠᠭᠤᠰᠬᠢ᠂ ᠡᠯᠢᠭᠡ᠂ ᠲᠡᠯᠢᠬᠦᠦ ᠨᠢ ᠪᠡᠷᠳᠡᠵᠤ ᠴᠢᠰᠦ ᠨᠢ ᠴᠠᠯᠬᠢᠨ ᠨᠦᠵᠢᠷᠡᠨ ᠲᠤᠭᠳᠠᠵᠤ᠂ ᠤᠬᠠᠭᠠᠨ | ᠪᠠᠯᠠᠷᠠᠨ ᠬᠡᠪᠲᠡᠷᠢ ᠳᠤ ᠤᠷᠤᠭᠰᠠᠨ ᠰᠢᠷᠠᠬᠳᠤᠭᠰᠠᠳ ᠲᠤ ᠲᠤᠬᠢᠷᠠᠨᠠ᠃ ᠬᠦᠨᠳᠦ ᠨᠢ ᠠᠮᠠᠨ ᠳᠤ ᠨᠢ ᠴᠢᠰᠦ ᠠᠮᠳᠠᠭᠳᠠᠬᠤ᠂ ᠴᠢᠰᠦ ᠪᠠᠷ ᠬᠠᠨᠢᠶᠠᠬᠤ᠂ ᠪᠦᠭᠡᠯᠵᠢᠬᠦ᠂ | ᠶᠠᠰᠤᠨ ᠠᠴᠠ ᠴᠢᠰᠦ ᠭᠠᠷᠬᠤ᠂ ᠭᠠᠷ ᠬᠦᠷᠴᠤ ᠪᠤᠯᠬᠤ ᠦᠭᠡᠢ ᠬᠦᠨᠳᠤᠭᠦᠷ ᠲᠠᠢ ᠪᠠᠶᠢᠳᠠᠭ᠃ ᠴᠠᠭᠠᠨ ᠪᠠᠷᠢᠶᠠ ᠶᠢᠨ ᠪᠦᠷᠢᠯᠳᠦᠬᠦᠨ᠄ | 1᠂ ᠲᠡᠮᠡᠭᠡᠨ ᠤ ᠬᠦᠬᠡ ᠬᠤᠷᠭᠤᠯ ᠤᠨ ᠰᠢᠳᠠᠭᠠᠭᠰᠠᠨ ᠦᠨᠡᠰᠦ 4 ᠵᠢᠩ᠃ | 2᠂ ᠪᠤᠭᠤᠳᠠᠢ ᠶᠢᠨ ᠬᠠᠯᠢᠰᠤ 2 ᠵᠢᠩ᠃ | 3᠂ ᠵᠢᠩᠬᠢᠨᠢ ᠪᠤᠯᠪᠠᠰᠤᠷᠠᠭᠰᠠᠨ ᠴᠢᠯᠠᠭᠤᠨ ᠨᠡᠬᠦᠷᠡᠰᠦᠨ ᠲᠠᠯᠠᠬᠠ 1 ᠵᠢᠩ ︵ᠬᠢᠯᠳᠠᠭᠠᠨᠠᠭᠰᠠᠨ ᠪᠦᠬᠡᠳ ᠬᠦᠩᠬᠡᠨ ᠪᠠᠶᠢᠬᠤ︶᠃ | 4᠂ ᠲᠠᠬᠢᠶᠠᠨ ᠦᠨᠳᠡᠭᠡᠨ ᠤ 9 ᠪᠦᠬᠦᠯᠢ ᠰᠢᠷᠠ᠂ ᠴᠠᠭᠠᠨ᠃ | 5᠂ ᠰᠢᠷᠠ ᠬᠦᠵᠢ 1 ᠪᠠᠭᠴᠠ ᠶᠢ ᠲᠠᠯᠠᠭᠯᠠᠵᠤ ᠬᠢᠬᠦ᠃ | 6᠂ ᠼᠤᠤ 1 ᠵᠢᠩ ︵ᠬᠤᠭᠤᠯᠠᠨ ᠼᠤᠤ︶᠃ | 7᠂ ᠬᠠᠷᠠ ᠠᠷᠢᠬᠢ ︵65 ᠭᠷᠠᠳᠦ᠋ᠰ᠂ ᠬᠠᠷᠢᠨ ᠰᠫᠢᠷᠲ ᠪᠢᠰᠢ︶᠃ | 8᠂ ᠪᠤᠷᠤ ᠴᠠᠭᠠᠰᠤ 8 ᠠᠮᠠ᠃ | ᠴᠠᠭᠠᠨ ᠪᠠᠷᠢᠶᠠ ᠶᠢ ᠨᠠᠶᠢᠷᠠᠭᠤᠯᠬᠤ ᠳᠤ ᠪᠠᠨ ᠴᠠᠭᠠᠰᠤ ᠠᠴᠠ ᠪᠤᠰᠤᠳ ᠲᠤᠯᠤᠭᠠᠨ ᠪᠦᠷᠢᠯᠳᠦᠬᠦᠨ ᠢᠶᠠᠨ ᠲᠤᠯᠤᠭᠠᠨ ᠲᠠᠮᠠᠭᠠᠳᠤ ᠰᠢᠷᠡᠮᠦᠨ ᠲᠤᠭᠤᠭᠠᠨ ᠳᠤ ᠬᠢᠵᠤ | ᠬᠦᠯ ᠦᠭᠡᠢ ᠤᠰᠤ ︵ᠬᠤᠪᠤᠭᠤ ᠪᠠᠷ ᠲᠠᠳᠠᠵᠤ ᠭᠠᠷᠭᠠᠭᠠᠳ ᠭᠠᠵᠠᠷ ᠲᠠᠯᠪᠢᠬᠤ ᠦᠭᠡᠢ ᠠᠪᠴᠢᠷᠠᠭᠰᠠᠨ ᠤᠰᠤ︶ ᠬᠢᠵᠤ ᠰᠢᠩᠭᠡᠷᠡᠬᠦᠯᠦᠨ ᠵᠦᠭᠡᠯᠡᠨ ᠭᠠᠯ ᠢᠶᠠᠷ | ᠪᠤᠴᠠᠯᠭᠠᠵᠤ ᠠᠮᠤᠰᠤ ᠠᠳᠠᠯᠢ ᠦᠳᠭᠡᠷᠡᠬᠦᠯᠵᠤ ᠲᠡᠪᠢᠬᠦᠷ ᠪᠤᠶᠤ ᠠᠳᠠᠷ ᠲᠤ ᠬᠢᠵᠤ ᠬᠦᠷᠦᠭᠡᠰᠬᠢᠭᠡᠳ 50 ᠭᠷᠠᠳᠦ᠋ᠰ ᠪᠤᠯᠬᠤ ᠦᠶᠡ ᠳᠤ ᠨᠢ ᠬᠦᠭᠡ ᠪᠦᠰᠡᠨ ︵ | ᠪᠠᠶᠢᠪᠠᠩ ᠲᠠᠢ ᠪᠤᠳᠤᠭᠯᠠᠭᠰᠠᠨ︶ ᠳᠤ ᠴᠢᠳᠬᠤᠵᠤ ᠪᠦᠰᠡ ᠪᠠᠨ ᠤᠭᠤᠳᠠᠯᠠᠨ ᠪᠤᠭᠤᠵᠤ ᠬᠠᠪᠲᠠᠭᠠᠢ ᠮᠤᠳᠤᠨ ᠲᠡᠭᠡᠷᠡ ᠤᠭᠤᠳᠠ ᠶᠢᠨ ᠢᠷᠤᠭᠠᠷ ᠢᠶᠠᠷ ᠨᠢ ᠨᠦᠳᠦᠵᠤ | ᠪᠠᠷᠢᠶᠠ ᠪᠠᠨ ᠴᠢᠭᠵᠢᠷᠡᠬᠦᠯᠦᠨᠡ᠃ ᠡᠪᠡᠳᠴᠢᠲᠡᠨ ᠢᠶᠠᠨ ᠤᠷᠤ ᠲᠡᠭᠡᠷᠡ ᠨᠢ ᠲᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠬᠡᠪᠳᠡᠬᠦᠯᠵᠤ᠂ ᠪᠦᠭᠡᠷᠡᠨ ᠤ ᠲᠤᠭᠤᠤᠷ ᠨᠢ ᠮᠧᠳ᠋ᠷ ᠬᠠᠭᠠᠰ | ᠬᠦᠭᠡ ᠪᠦᠰ ᠢᠶᠠᠷ ᠭᠤᠤᠯ ᠢᠶᠠᠷ ᠨᠢ ᠨᠤᠭᠤᠯᠵᠤ ᠲᠡᠪᠢᠰᠦᠭᠡᠳ᠂ ᠦᠰᠦ ᠦᠯᠢᠶᠡᠬᠦ ᠳᠤ ᠲᠠᠰᠤᠷᠴᠤ ᠪᠠᠶᠢᠬᠤ ᠬᠤᠷᠴᠠ ᠬᠢᠳᠤᠭᠠ ᠪᠤᠶᠤ ᠲᠤᠩᠭᠤᠷᠠᠭ ᠢᠶᠠᠷ | ᠡᠪᠡᠳᠴᠢᠲᠡᠨ ᠤ ᠠᠶᠤᠤᠯᠢᠬᠠᠢ ᠶᠢᠨ ᠮᠦᠭᠡᠷᠰᠦ ᠠᠴᠠ ᠲᠤᠷᠤᠭᠰᠢ ᠬᠤᠶᠠᠷ ᠠᠯᠠᠭᠠ ᠲᠡᠯᠭᠡᠵᠤ ᠪᠠᠭᠳᠠᠬᠤ ᠬᠡᠮᠵᠢᠶᠡᠨ ᠳᠤ ᠠᠷᠠᠰᠤᠨ ᠤ ᠬᠦᠷᠦᠰᠦ ᠳᠤ ᠬᠤᠷᠴᠠ | ᠮᠡᠰᠡ ᠶᠢᠨ ᠢᠷ ᠢᠶᠠᠷ ᠨᠢ ᠬᠦᠷᠭᠡᠵᠤ ᠲᠡᠮᠦᠷ ᠤᠨ ᠬᠠᠤᠷᠠᠢ ᠰᠢᠭ᠋ ᠭᠤᠷᠪᠠᠯᠵᠢᠨ ᠢᠶᠠᠷ ᠭᠡᠷ ᠤᠨ ᠬᠠᠭᠠᠯᠭᠠᠨ ᠤ ᠮᠤᠳᠤᠨ ᠤᠨᠢᠰᠦ ᠪᠠᠷ ᠮᠡᠰᠡ ᠶᠢᠨ ᠬᠡᠵᠢᠬᠡ ᠶᠢ ᠨᠢ | ᠲᠤᠭᠰᠢᠵᠤ ᠲᠤᠮᠨᠤᠨᠠ᠃ ᠲᠤᠷᠬᠢᠭᠠᠬᠤ ᠲᠤᠮ ᠢ ᠬᠢᠬᠦ ᠳᠤ ᠪᠠᠨ ᠡᠪᠡᠳᠴᠢᠲᠡᠨ ᠢᠶᠠᠨ ᠲᠡᠭᠡᠭᠰᠢ ᠬᠠᠨᠳᠤᠭᠤᠯᠤᠨ ᠲᠦᠪ ᠬᠡᠪᠳᠡᠬᠦᠯᠵᠤ ᠬᠠᠪᠲᠠᠭᠠᠢ ᠮᠤᠳᠤ ᠶᠢ ᠬᠤᠶᠠᠷ | ᠬᠦᠯ ᠤᠨ ᠤᠯᠠ ᠳᠤ ᠨᠢ ᠨᠠᠭᠠᠯᠳᠤᠭᠤᠯᠵᠤ᠂ ᠲᠤᠷᠳᠤᠩ ᠪᠦᠰᠡ ᠪᠠᠷ ᠬᠤᠳᠠᠷᠭᠠᠯᠠᠨ᠂ ᠬᠤᠶᠠᠷ ᠭᠠᠷ ᠲᠤ ᠨᠢ ᠤᠷᠢᠶᠠᠨ ᠲᠡᠨᠢᠢᠲᠡᠯᠡ ᠨᠢ ᠢᠰᠬᠦᠯᠦᠬᠦᠯᠵᠤ ᠪᠠᠶᠢᠭᠠᠳ | ᠬᠠᠪᠲᠠᠭᠠᠢ ᠮᠤᠳᠤᠨ ᠲᠡᠭᠡᠷᠡ ᠨᠢ ᠴᠠᠢ ᠨᠦᠳᠦᠳᠡᠭ ᠰᠦᠭᠡ ᠪᠠᠷ ᠲᠡᠮ ᠲᠠᠢ ᠭᠤᠷᠪᠠ ᠴᠤᠬᠢᠵᠤ ᠲᠤᠷᠬᠢᠭᠠᠨ ᠲᠠᠬᠢᠨ ᠬᠠᠪᠲᠠᠭᠠᠢ ᠮᠤᠳᠤ ᠪᠠᠨ ᠪᠠᠷᠠᠭᠤᠨ ᠵᠡᠬᠦᠨ | ᠬᠠᠪᠢᠷᠭᠠᠨ ᠳᠤ ᠨᠢ ᠨᠠᠭᠠᠯᠳᠤᠭᠤᠯᠵᠤ ᠮᠤᠳᠤᠨ ᠲᠡᠭᠡᠷᠡ ᠠᠴᠠ ᠮᠥᠨ ᠰᠦᠬᠡ ᠪᠠᠷ ᠨᠢᠭᠡ ᠴᠤᠬᠢᠵᠤ ᠲᠤᠷᠬᠢᠭᠠᠭᠠᠳ ᠲᠡᠬᠦᠰᠭᠡᠨᠡ᠃ ᠡᠨᠡ ᠨᠢ ᠤᠨᠠᠵᠤ ᠪᠡᠷᠲᠡᠭᠰᠡᠨ ᠢ | ᠲᠤᠷᠬᠢᠭᠠᠵᠤ ᠬᠤᠷᠠᠭᠰᠠᠨ ᠴᠢᠰᠤ ᠤᠰᠤ ᠶᠢ ᠨᠢ ᠰᠠᠷᠨᠢᠭᠤᠯᠵᠤ ᠪᠠᠶᠢᠭᠠ ᠶᠤᠮ᠃ | ᠴᠠᠭᠠᠨ ᠪᠠᠷᠢᠶᠠ ᠪᠠᠷᠢᠬᠤ ᠳᠤ ᠪᠠᠨ ᠬᠡᠳᠡᠰᠦᠨ ᠲᠡᠭᠡᠷᠡᠬᠢ ᠠᠷᠢᠬᠢ ᠼᠤᠤ ᠪᠠᠷ ᠲᠡᠪᠳᠦᠭᠡᠭᠰᠡᠨ ᠵᠤᠵᠠᠭᠠᠨ ᠨᠦᠢᠲᠠᠨ ᠴᠠᠭᠠᠰᠤᠨ ᠲᠡᠭᠡᠷᠡ ᠨᠢ ᠤᠭᠤᠳᠠᠯᠠᠭᠰᠠᠨ | ᠬᠠᠯᠠᠭᠤᠬᠠᠨ ᠪᠠᠷᠢᠶᠠ ᠪᠠᠨ ᠲᠠᠯᠪᠢᠵᠤ ᠬᠦᠭᠡ ᠪᠦᠰᠡ ᠪᠠᠷ ᠤᠷᠢᠶᠠᠵᠤ ᠵᠤᠬᠢᠰᠲᠠᠢ ᠪᠠᠷ ᠬᠤᠴᠢᠵᠤ ᠬᠤᠶᠠᠷ ᠴᠠᠭ ᠪᠠᠷᠢᠵᠤ᠂ ᠨᠢᠭᠡ ᠴᠠᠭ ᠤᠨ ᠲᠠᠷᠠᠭᠠ ᠲᠦᠯᠦᠭᠡᠨ | ᠬᠤᠨᠢᠨ ᠤ ᠭᠤᠤᠯ ᠮᠢᠬᠠᠨ ᠱᠦᠯᠦ ᠳᠤ ᠰᠤᠩᠬᠢᠨᠠ ᠨᠡᠷᠡᠵᠤ᠂ ᠠᠭᠠᠷᠤ 35 ᠶᠢ ᠲᠠᠷᠤᠭᠤᠯᠵᠤ ᠤᠤᠭᠤᠯᠭᠠᠨ ᠬᠦᠯᠦᠰᠦᠯᠡᠬᠦᠯᠦᠨᠡ᠃ ᠢᠩᠬᠢᠪᠡᠯ ᠡᠮ ᠱᠦᠯᠦ | ᠤᠤᠭᠤᠭᠰᠠᠨ ᠡᠪᠡᠳᠴᠢᠲᠡᠨ ᠤ ᠪᠡᠶᠡ ᠠᠴᠠ ᠬᠦᠯᠦᠰᠦ ᠴᠢᠬᠠᠷᠠᠨ ᠲᠤᠰᠤᠯᠠᠵᠤ ᠤᠨᠳᠠᠵᠤ ᠠᠮᠠᠷᠠᠳᠠᠭ᠃ | ᠪᠠᠷᠢᠭᠰᠠᠨ ᠪᠠᠷᠢᠶᠠ ᠪᠠᠨ ᠠᠪᠬᠤ ᠳᠤ ᠪᠠᠨ ᠪᠦᠳᠦᠨ ᠬᠤᠶᠠᠷ ᠴᠠᠭ ᠪᠤᠯᠪᠠᠯ ᠡᠬᠦᠲᠡ ᠴᠤᠩᠬᠤ ᠪᠠᠨ ᠬᠠᠭᠠᠨ ᠰᠠᠯᠬᠢ ᠬᠠᠭᠠᠵᠤ ᠪᠤᠭᠤᠯᠲᠠ ᠪᠠᠨ ᠲᠠᠶᠢᠯᠵᠤ | ᠪᠠᠷᠢᠭᠰᠠᠨ ᠭᠡᠰᠡᠭ ᠤᠨ ᠤᠯᠠᠪᠤᠷ ᠬᠦᠷᠦᠰᠦᠨ ᠲᠡᠭᠡᠷᠡ ᠨᠢ ᠰᠢᠷᠠ ᠲᠤᠰᠤ ᠲᠦᠷᠬᠢᠵᠤ ᠬᠠᠭᠤᠷᠠᠢ ᠬᠤᠪᠴᠠᠰᠤ ᠪᠠᠷ ᠬᠤᠴᠢᠵᠤ ᠰᠤᠪᠢᠯᠠᠨᠠ᠃ | ᠡᠮᠴᠢᠯᠡᠬᠦ ᠳᠤ ᠪᠠᠨ ᠽᠠᠨᠳᠠᠨ 3 ᠶᠢᠨ ᠲᠠᠩ᠂ ᠴᠢᠮᠡᠳ ᠮᠠᠷ ᠲᠠᠩ᠂ ᠱᠦᠩ ᠠᠭᠠᠷᠤ 8᠂ ᠠᠭᠠᠷᠤ 35᠂ ᠡᠯᠢᠭᠡᠨ ᠤ ᠬᠦᠷᠬᠦᠮ 13᠂ ᠴᠢᠯᠢᠰᠠᠨ᠂ | ᠰᠠᠮᠫᠢᠯᠨᠤᠷᠪᠤ᠂ ᠵᠠᠴᠦ᠋ᠩ 13᠂ ᠷᠠᠰᠢᠨᠠᠮᠵᠢᠯ᠂ ᠬᠡᠷᠪᠡ ᠴᠢᠰᠦ ᠬᠦᠭᠡᠷᠦᠯᠲᠡ ᠲᠠᠢ ᠪᠣᠯ ᠽᠠᠭᠠᠷ ᠮᠠᠷ ᠲᠠᠩ᠂ ᠴᠢᠰᠤᠨ ᠬᠢᠮᠤᠷᠠᠭᠠ ᠶᠢᠨ ᠲᠠᠯᠬᠠ ᠵᠡᠷᠭᠡ ᠶᠢ ᠵᠤᠬᠢᠰᠲᠠᠢ | ᠤᠤᠭᠤᠯᠭᠠᠨᠠ᠃ | ᠴᠠᠭᠠᠨ ᠪᠠᠷᠢᠶᠠ ᠪᠠᠷᠢᠭᠤᠯᠤᠭᠰᠠᠨ ᠡᠪᠡᠳᠴᠢᠲᠡᠨ ᠢ ᠰᠤᠪᠢᠯᠠᠬᠤ ᠳᠤ ᠪᠠᠨ ᠬᠦᠨᠳᠦ ᠨᠦᠰᠡᠷ ᠲᠠᠭᠤ ᠴᠢᠮᠡᠭᠡ ᠪᠤᠶᠤ ᠬᠤᠯᠠᠭᠠᠢ ᠰᠠᠯᠬᠢᠨ ᠳᠤ ᠴᠤᠬᠢᠭᠤᠯᠬᠤ ᠦᠭᠡᠢ᠂ | ᠲᠡᠷᠭᠡ ᠤᠨᠤᠭᠠ ᠤᠨᠤᠬᠤ ᠦᠭᠡᠢ᠂ ᠤᠰᠤ ᠭᠤᠤᠯ ᠭᠠᠳᠤᠯᠬᠤ ᠦᠭᠡᠢ᠂ ᠲᠠᠭᠤᠤ ᠪᠦᠵᠢᠭ ᠤᠨ ᠲᠠᠯᠠᠪᠤᠷ ᠲᠤ ᠤᠷᠤᠯᠴᠠᠬᠤ ᠦᠭᠡᠢ᠂ ᠬᠤᠷᠢᠴᠠᠯ ᠤᠨ ᠠᠮᠢᠳᠤᠷᠠᠯ ᠢ | ᠴᠡᠭᠡᠷᠯᠡᠨ ᠨᠠᠮ ᠵᠢᠮ 21 ᠡᠳᠦᠷ ᠬᠤᠨᠤᠭ ᠰᠠᠭᠤᠵᠤ ᠬᠡᠪᠳᠡᠨᠡ᠃ ᠰᠡᠷᠢᠬᠦᠨ ᠵᠦᠭᠡᠯᠡᠨ ᠬᠤᠭᠤᠯᠠ ᠤᠮᠳᠠ ᠤᠤᠭᠤᠵᠤ ᠢᠳᠡᠨᠡ᠃ ᠦᠰᠦ ᠬᠢᠮᠤᠰᠤ ᠪᠠᠨ ᠠᠪᠬᠤ | ᠦᠭᠡᠢ᠂ ᠲᠠᠪᠤᠰᠤ ᠲᠠᠢ ᠤᠰᠤ ᠪᠠᠷ ᠬᠦᠯ ᠢᠶᠠᠨ ᠤᠬᠢᠶᠠᠵᠤ᠂ ᠲᠤᠬᠢᠲᠠᠢ ᠬᠤᠪᠴᠠᠰᠤ ᠬᠤᠨᠠᠷ ᠡᠮᠦᠰᠬᠦ ᠬᠡᠷᠡᠭᠲᠡᠢ᠃ | ︽ᠤᠷᠠᠳ ᠲᠡᠤᠬᠡ ᠰᠤᠶᠤᠯ︾ ᠤᠨ ︵ᠲᠡᠭᠡᠳᠦ ᠲᠡᠪᠲᠡᠷ︶ ᠠᠴᠠ ᠪᠠᠭᠤᠯᠭᠠᠪᠠ | | |